لاب الاناتومي هو صورة مصغرة عن الاناتومي، بتاخدوا فيه صدر وبطن وحوض والدكتور بالاناتومي بيحكي وبشرح سلايداته بس بينما باللاب بتروح عالمختبر وبتشوف كل اشي عملياً، بتشوف العضلات يلي درستها بالاناتومي بمختبر الاناتومي وهيك ، المساق مع الدكتور معتصم وكان ع ايامنا الدكتور حمزة بس سافر فما بعرف مين رح يكون بديله بس بشكل عام دكاترة المختبر فخمين.
مواضيع المساق
رح تاخدوا عن الصدر والعضلات الموجودة فيه واشكالها ومن وين بتطلع ووين بتنتهي معلومات واضحه وسلسة بلغه مفهومه ورح تاخدوا عن البطن والعضلات يلي فيه والأعصاب يلي بتغذيه والحوض برضو بس احنا ما لحقنا ناخده بس أن شاء الله انتو بتغطو كل المادة لانها مهمه.
كيف تدرس المساق
كلشي بتاخده باللاب بتكتبه أو بتعلّم عليه بالشابتر وأهم اشي هون أنه تمسك المودل يلي بتدرسها والمجسمات تكون فاهمها لان الصورة الملموسة بتتخزن بالذاكرة احسن من الحفظ والبصم.
يوجد سلايدات وبتشتريها من المكتبة وممكن تاخدوها من الطلاب الأكبر منكم، وأغلبها صور وبتكون خفيفه وواضحة.
ويفضل الاعتماد على كتاب الأطلس في التشريح للتعرف على الصور الواضحة لأعضاء الجسم وأجزائها والذي يمكنكم تحميله من خلال الرابط هنا.
طبيعة الامتحانات
ما تخافوا من الامتحانات لأنها بتعتمد ع الدكتور ودكاترة المختبر متعاونين جدا لكن بعيد وبكرر ازا كان الكتروني ما تتوقعوا الاسئلة السهله لان الوجاهي ارحم بكتير والأسئلة صريحه وزي ما انشرحت.
في الغالب الامتحان الوجاهي ما بكون كتابه يعني بعطوك مجسم معين لعضلة وبحكولك شو اسمها وشو اسم العصب الي بغذيها وشو وظيفتها وممكن يعطوك مجسم لعظمة معينة ويسألوك عن العضلة الي بترتبط في جزء معين فيها ويسألوك عن هاي العضلة، وفي الغالب بتكون الأسئلة كلها مباشرة وبتنحل بسرعة وطبعا بكون الك وقت معين عند كل مجسم حتى تحل الاسئلة الي عليه وتنتقل للي بعده.
شو استفدت منه
اللاب بفهمك الاناتومي وفي معلومات مستحيل تنساها زي شكل العضلات واسماء الطبقات واسماء الأعصاب لو مش متذكر مين بغذو بس في معلومات كتير رح تكتسبها ومصطلحات جديدة اهم اشي ما تراكم وتدرس اول باول حتى تطلع من المساق بأكثر فائدة ممكنة وما تنضغط وقت الامتحانات.
الكاتبة: سماح أبو سرحان